50 Aña despues di sali number 2 na Miss Universe

13/07/2018

http://www.missnews.com.br/historia/50-ana-despues-di-sali-number-2-na-miss-universe/

594    0

13 de julho de 2018


Anne Marie Braafheid: “Pueblo a premia mi pa mi logro”


WILLEMSTAD .- Dia 13 di yüli 1968, esnan ku tabatin televishon ku pa e tempu ei tabata un luho ekstraordinario tabata klabá pa mira e sertámen di Miss Universe di e aña ei. E sertámen a tuma lugá na Miami Beach Auditorium (Florida, Merka). Ainda e transmishon e tempu ei tabata na pretu i blanku. Un alegria enorme a reina na Kòrsou na momentu ku a resultá ku Anne Marie Braafheid, un maestro di skol di promé klas ku Kòrsou a delegá pa sertámen, a bai ku e título di runner-up. Anne Marie anteriormente den e sertámen lokal a representá Hotèl Intercontinental. Hopi a mir’é komo e ganador apsoluto na Miss Universe. Mundu aparentemente no tabata kla ainda pa un Miss Universe di koló, loke tabata e komentarionan di e tempu ei. E representante di Brasil, Martha Vasconcellos a resultá e ganador.



50 Aña despues den un entrevista eksklusivo ku EXTRA, Anne Marie ta mira bèk riba e anochi fantástiko aki. “Mi a pasa e buèlta di trahe di baño den forma estupendo i e pregunta ku e legendario maestro di seremonia Bob Barker a hasi na mi, mi a kontestá na satisfakshon. Mi a papia hasta papiamentu na momentu ku Barker a pidi mi hasi esei. Mi ta kere ku e aspekto di kolo tòg finalmente a hunga un ròl ku mi no a sali. Kòrda ku na aprel di e aña ei tabatin e asesinato di Martin Luther King ku ainda tabata pisa Merka, mundu i e sertámen. Mundu no tabata kla pa un Miss Universe di koló. Den un sertámen na Merka saka un ganador di koló, i despues presentá tur kaminda ku un Miss Universe di koló den un tempu asina ei tabata difísil. E organisadónan i e hurado a tene kuenta ku e punto ei”, asina Anne Marie ta bisa.



Segun e beyesa, despues di e sertámen ainda tabata parse ku e organisadónan no tabata kier a mir’é ku e korona. Tabata konosí ku Martha ku a gana e título máksimo tabata deseá di entregá e korona komo ku e kier kasa. “Sinembargo nunka a aserká mi pa e eventualidat ei anke ta bisa semper na final ku dado kaso e ganador no por sigui ku e título, e runner-up ta asumí e reinado. Tabatin tambe e anunsio ku a bisa ku lo bai Filipinas komo parti di e sertámen, pero finalmente no a bai. Pero ta resultá den e biografia di Martha ku Anne Marie tin un kopia di dje ku debidamente a bai Filipinas e tempu ei. “Mi no a haña un invitashon pa ta parti di e delegashon aki”, asina Anne Marie ta bisa despues di a lesa e buki.


Te awe Anne Marie tin kontakto ku Martha anke nan no a topa mas despues for di 1968. Na Brasil a tene un seremonia speshal resientemente na Bahia pa gradisí Martha pa su logro despues di 50 aña. Martha tabata representante di Bahia den e sertámen di Miss Brasil. Resientemente a tene un seremonia den kua a gradisí Martha pa su trabou komo Miss Brasil. E fin di siman aki lo rekordá ku 50 aña pasá ku Martha a gana e sertámen di Miss Universe.



Na Kòrsou no tabatin un distinshon te awe pa Anne Marie. Ni nòmber di kaya, ni kondekorashon, ni krus di mérito, ni pen di e bon Yu di Kòrsou. “Pueblo si a premia mi ku un resepshon na Kòrsou ku a pone míles di hende riba pia. Esei tabata e mihó premio pa mi. Importante ta tambe ku tur kaminda ku mi bai te awe nan ta bisa: ata Anne Marie. Na Kòrsou, na Aruba, na Boneiru, Islariba, Ulanda i Sürnam. Tin un kalor speshal pa mi tur kaminda ”, asina e ta bisa. Riba e pregunta si e ainda e ta habrí pa un distinshon speshal, Anne Marie ta bisa ku e lo no ninga esei. “Kòrsou ta mi alma”, asina e leyenda na bida ta añadí.


Den eksterior si el a haña hopi rekonosimentu. Por ehèmpel e revista di fama mundial; Ebony a dediká un seshon speshal na su persona siendo e promé hende muhé di koló ku a yega asina haltu riba pedestal di Miss Universe. Revistanan di Venezuela tur tabata yen ku reportahe riba Miss di Kòrsou, ku inkluso a gana nan kandidata e tempu ei ku tambe tabata den e finalistanan. Anne Marie tin tur e rekuerdonan aki bon wardá. Artíkulonan huntu ku portrèt tantu di loke a sali internashonalmente komo lokalmente ta den un map speshal ku e tin bon konservá. Den dje por mira e sertámen ku a tuma lugá na Kòrsou, e koronashon ku tabata na enkargo di su predesesor Imelda Thodé, e programa di e sertámen ku tur e kandidatanan di rònt mundu ku a partisipá Na Miss Universe ku tabata 65 en total, su presentashon na Miss Universe den trahe típiko, trahe di baño i trahe elegante. Nan tur ta un relikia den e kolekshon di Anne Marie. E ta kòrda ku riba e dia di e sertámen su mama tabata den hospital i su ruman muhé a pèrdè yu. No opstante e faktornan aki, el a presentá tur ku tin pa kue puesto number 2. “Mi a keda ku mi focus”.



Na aeropuerto un kantidat grandi di hende a risibié, entre nan mandatarionan manera Chicho Jonckheer i Boy Rozendal. Míles di hende a aglomerá den kaya pa mira nan “Miss” ku tabata riba un karosa manera sa usa den karnaval. Den Netto Bar tin un portrèt bon wardá di e momentu ku pueblo a risibí su representante ku masha kalor. Rudy Plaate a saka un disko speshal na honor di Anne Marie.


Te awe Anne Marie ta lusi ku su beyesa speshal . “Mi ta kere ku genétika ta hunga un ròl. Pero tambe kome bon i wanta bo kurpa den bon kondishon. Manera mi ta mi ta. Mi no a drecha nada pa mi ta loke mi ta awe”, asina e ta splika ainda resplandesiendo manera kos ku añanan no a pasa.


E eks-Miss Kòrsou ta kere ku el a yuda den emansipashon di e hende muhé di kolo na Kòrsou. “Kòrsou a realisá promé ku Merka mes ku “black is beautiful”. Antes nan tabata laga nos sinti hopi ku nos no ta konta. Den klas ta pone nos sinta patras. Den shownan di moda mucha di koló no tabata konta”.



Anne Marie ta kere ku Kòrsou tin potensial pa bin ku e premio den futuro. Ta un promoshon enorme pa Kòrsou. Den futuro no masha leu, nos lo yega dje leu ei. Meskos ku den futbòl nos ta mira ku paisnan chikitu tin éksito, kisas suerte lo toka nos tambe. Importante pa nos hendenan forma nan mes pa nan ta bon prepará pa nan presentashon. Huntu ku e parti interno, nos lo sigui sobresalí. Na e sertámennan aki tambe”, asina Anne Marie ta bisa.


Anne Marie ta kasá ku e aktivista revolushonario Stanley Brown. E matrimonio a produsí un yu muhé. “Stanley ta e amor di mi bida i nos a kasa dos bes. Despues na kuminsamentu di dékada 70 nos a kasa pero nos a separá despues pasobra tabata tempu ku hende muhé no por a sigui traha komo maestro di skol si nan ta kasá. Mi a pasa den hopi kos bon, pero tambe den kosnan inhustu ku hende no sa di nan. Kosnan a kambia sinembargo den kurso di añanan. Aña pasá nos a bolbe kasa. Stanley a sende serka mi e lus revolushonario di hopi kos robes ku tabata pasa den pasado i ku ainda tei den nos komunidat. Esei ta tambe e punto fuerte di nos union”.



https://extra.cw/50-ana-despues-di-sali-number-2-na-miss-universe/


 

Talvez você se interesse também por:
COMENTÁRIOS - Clique aqui para fazer o seu
Novo comentário
Nome

E-mail (não será mostrado, mas será necessário para você confirmar seu comentário)

Comentário (de 1000 caracteres)
Nota: antes de enviar, certifique-se de que seu comentário não possui ofensas, erros de ortografia ou digitação, pois estará sujeito a avaliação e, também, não poderá ser corrigido.

Seja o primeiro a comentar.

Ⓒ MissesNews.com.br  |  Desenvolvimento: